話說娜姐(對我黎講應該都係"姐"? 總之係尊稱啦~)發起一個齊齊發文既活動, 要大家去發掘一下屋企裡面收埋收埋既物品, 睇下有邊D野係買左返黎但又無用(或無用過, 無需要既), 但又一直咁買既野.

老實講, 我有好多野係買既時候已經知道唔會用到, 就算係都用唔晒咁多既野. 買買買, 買到一大堆, 十年都未用得到.

建議玩法／大綱如下：

1. 搜出家中一直被擱在一旁的物品（題材不限）；

2. 拍個照、附文說明；

3. 反思不良習慣的禍害；

4. 訂下處理方法／大計；

5. 鮮奶國內的請互發引用通知，鮮奶國外的請在拙博當天出文以留言通知文章位置，方便更新群博文章列表。

請睇以下圖片:

其實買大咗既仲有好多野, 不過先講一講我買埋一大堆既鎖匙扣開始啦~ 話說十年前去左一次日本旅行, 咁去旅行除左影相就梗係買紀念品架啦~ 之但係好多紀念品都好鬼貴又唔等駛, 咁又俾我睇到一樣又平又有記念價值又實用既野喎, 咁咪去到邊度都買一個(甚至好多個)囉~ 結果就買到一堆但又無用到既鎖匙扣...

來自日本富士急遊樂園, 精美閃亮銀牌鎖匙扣. 為左本文先拆出黎影相架~ 封存左都差唔多十年~ 本來諗住做手信既, 但結果又想自己用, 然後又因為搬屋Pack左入箱所以唔記得左有呢件野. 一直至今.

同樣來自日本富士急遊樂園. 我諗算係一款招牌(??)既鎖匙扣, 用皮做架, 我記得好似係買左兩架, 但家陣係搵得到一架... 雖然車仔細細, 但放係褲袋做鎖匙扣唔係太適合, 除非鎖匙習慣放係手袋或者揹袋既人會岩用囉~ 車頭既火係我欣賞呢個鎖匙扣既重點.

呢隻手套相信大家一睇都知佢係乜, 話說去得日本東京地區旅遊, 唔去迪士尼, 真係講都無人信. 咁我都話晒係十八廿二既年紀, 唔去遊樂場, 唔通專攻神社咩! (話說真係有想去一次日本專門睇神社架~ 有巫女睇嘛? 笑~)
350YEN, 好平既. 不過我個人黎講唔係咁喜歡米老鼠既, 因為我係唔點聽得明佢噏乜. 好怕老鼠既我, 又頂唔順講野尖音既人, 可想而知我有幾唔鐘意. (咁又買?) 主要都係因為睇下有無人鐘意, 用黎送禮呀, 或者人地生日咁咪可以用得著囉~

銀閃閃既係米老鼠既頭, 又係一個鎖匙扣. 呢個仲要係個頭入面有野, 做成一個"long long"咁, 都幾係嘈咁既. 想用都幾難啦~ 不過又係見佢咁鬼平(380YEN), 所以咪又買囉.
其實我覺得呢個似係掛係手提電話既手機繩咁既野多過鎖匙扣囉~ 但係佢又同當係鎖匙扣咁賣. 可能可以兩用?!

呢一個我都真係唔知佢算點. 我係見佢話可以長壽架喎, 咪買囉. 大概可能係當時食左兩隻蛋飽得滯, D血唔係個腦度所以無點諗. 大既一串都仲可以用黎掛係手機或者手袋拉鏈位, 但細個粒到底點用? 放係邊度先岩?! 有人話呢D咁既細粒野係放係手袋隨身帶, 但, 唔會唔見既咩? 真係當護身符咁用架?

呢一個就真係有用過啦~ 一次買左兩個, 其實家陣兩個都用到咁上下爛. 您睇:

眼都甩晒, 個頭都撞到爆晒咁, 好鬼可憐. 本來個嘴係波浪紋咁樣, 好似好好笑咁, 但盲成咁, 變左苦笑?

睇埋背面, KURO (黑) 都無左個"O", 好似雞蛋殼咁甩晒啦~ 不過用左咁多年, 都算係咁. 話時話, 佢連頭頂連住個扣果個位都甩過不下十次, 就算用強力膠都黐唔到幾耐咁...

紅色呢塊牌就寫清楚佢既出處啦~ 大涌谷. 睇下面呢個小擺設就知其實佢個樣係好可愛下架~

您睇下佢隻腳丫, 係蛋裡面急不及待咁撐出黎啦~

呢一個都可算經典, 當時電車GO! 呢個遊戲可以話得係唔知點解會咁鬼死受歡迎. (謎之聲:咩黎架? 都無聽過!) 以體積計, 仲大過我D所有既鎖匙加埋既總體積, 點用丫. 一路都未換過電, 一路都未正式爆過機. 有無人有寫攻略?!

呢個勁呀! 係夜光版初號機呀! 真係唔講得笑, 除左係週邊專賣特集之中見過之外, 週圍都無得賣架. (會唔會因為無人要買呢?) 入手價錢已經唔記得. 同埋都唔會再點發光咁. 但因為未開封, 如果有人想要, 我諗出面市價都幾高下. (EVA既週邊咁多, 狂熱FANS早就破左產, 一係就停左手啦~ 無人要架啦~)
(其實我仲有淩波零既鎖匙扣, 使徒都有...)

呢一個係日本淺草寺既代表符號象徴, 雷門大燈籠既鎖匙扣.

雖然鎖匙扣係實用既野, 但買一大堆都無用到既, 即使再細再唔晒位都係無意思既. 好彩無乜"禍害", 收埋佢地入箱就"眼不見為乾淨". 記得見到新既鎖匙扣唔好再買就OK啦~
不過記取買鎖匙扣呢個教訓, 都係唔好諗住"將來"有用而買啦, 除非個將來係好鬼近期, 同埋係平就買啦~
(好似無認真反思咁...)
(不過"唔等駛"既野都好似仲有好多咁...大掃除? 咩黎架? 食得架?)