這是一間新開業的日式料理拉麵店。我是今天看到報紙上的廣告，被廣告中的「正宗日式碳燒（多倫多唯一一間）」這句話吸引，所以午餐時份就特別去闖一闖。

廣告詞：
「全店新張 15% OFF　各類串燒 買一送一」
「特別推薦正宗日式碳燒（多倫多唯一一間）」
「地道日本拉麵　◎不含味素　◎有機蔬菜熬湯底」

這是店外的拍的照片。
其實當我發現這餐廳係呢個「死位」，我即時覺得呢一餐會出事。
話說呢個「死位」已經轉手有四五次，旁邊既麗斯餐廳由最初開到家陣，但隔離呢個位就開咩都死，真係咩風格都做唔長，我真係有少少擔心囉。

店裡面拍的照片。
睇黎就係無重新裝修過，完全用番之前一手雲南菜既裝修，連杯碟都係用上一手既。（其實係咪無轉手，就不過轉菜式呢？）

餐牌就無必要去影啦。
無話咩「招牌拉麵」既穩陣選擇，而且睇落拉麵既主要款式係「擔擔拉面」為主，咁就一於揀一款「叉燒擔擔拉面」啦～
英文係 Spicy BBQ Pork Ramen 喎。
想試下佢地既串燒，就揀左一串「雞肉京蔥串」試一試佢地既醬汁啦～

等左一陣，拉麵上桌。
點解顏色咁單調，幾乎完全係淺啡色，係得蛋黃同埋海帶（我覺得似係雲耳）有少少色咁，好唔吸引喎。
飲啖湯，唔辣喎。有芝麻同埋蒜頭既味，我諗係豬骨湯底卦？
睇下配料，用芽菜（雖然我唔鐘意）但無我鐘意食既筍乾，有無搞錯呀？！加上好多唔綠又唔白既蔥花，同埋有少少酸既椰菜（係咪酸菜或者泡菜黎架？），加埋又唔似海帶又唔似雲耳既配菜，幾失敗咁喎。
雞蛋一睇就唔吸引啦。雖然我明白多倫多既餐飲條例可能係唔容許去做半生熟既蛋，但至少都應該控制一下火候，唔好煮到蛋黃既邊有黑色裙邊丫。
叉燒，又唔甜又唔鹹又唔辣，無燒過又無特別味道，好普通既幾塊豬肉囉。

一邊食一邊等雞肉串燒，居然廚房有人走出黎播「東山飄雨西關晴」既 DVD 。真係無野講，成間舖頭得我一個客，我真係有想問佢可唔可以閂左佢。
一路食，食完連湯到飲到七七八八，果兩串既「雞肉京蔥串」先出黎。因為 $1.50 一串，然後新張特價買一送一，所以有兩串。
雞肉串既味道，有甜有酸，酸味好似比較強左少少。豉油味（或鹹味）好似唔係咁夠，京蔥好似黑左少少，整體既味道就唔係咁好囉。如果可以唔係咁酸（其實都唔係好酸，不過係有食得出酸味），甜少少同鹹少少可能會更加好囉。
我明白串燒有少少酸味係可以帶出食物既味道，同埋可以令到串燒無咁油膩，可以變得清爽。但係醬汁好濕，完全唔夠杰，而且我完全感覺唔到燒烤既味道，好似只係用焗爐或者用油煎熟既雞肉囉～
因為都等到麵都食完，所以好快咁食完兩串串燒就埋單走人，無影到兩串串燒既樣。

可能係幾個後生仔夾錢創業，所以就想搞一間比較有綽頭既小餐廳。唯有希望佢地可以改進一下拉麵既味道同埋賣相，仲有就係串燒既選擇可以變得有更加多唔同既種類。否則以現時呢一份菜單以及咁既水準，我擔心佢會延續呢個「死位」既命運啊～

地址：多倫多 六百六十八號 銀星大道 二零一室
668 Silver Star Boulevard
Unit 201, Scarborough,
Ontario, Canada.
(416)321-1899
營業時間：中午十二點　至　深夜兩點半