其實第一次食鴨舌係幾耐之前已經完全無印象，但一試之後就一直都鐘意食到今時今日。係香港要買已經鹵好既鴨舌真係好方便，而且價錢仲好平（相對多倫多既價錢），就算係買生既都唔平啊～
自己係屋企做，可以控制數量之外，仲可以決定鴨舌既軟爛程度，同埋口味既鹹甜甚至辣度。
您睇下鴨舌幾貴丫，成 $13.98 一磅，即係要差唔多一百蚊港紙一磅呀！呢度得三十條，就 $5.03 加元，四十蚊港紙得咁少，我諗無乜人會買返去整。出去食可能都係差唔多（或者仲平？）。
呢度鴨舌咁貴既主要原因，係少人食。連茶樓或燒臘檔都好少會買鴨舌整黎賣，而且本地人應該係完全唔食既（本地人既超市連鴨都好少賣，可能真係要出去餐廳先會食鴨胸之類既菜式？），所以農場一般都唔會留起鴨既內臟。
咁一大煲鹵水剩係鹵鴨舌好似無乜野食咁，所以就買一包鴨翼一齊鹵。
鴨翼就平好多啦～
選擇左用香港出品既八珍鹵水汁，因為無試過丫嘛。同埋我覺得佢同李錦記兩者比較之下，我會揀八珍囉，感覺上佢係老字號既醬料丫嘛。
除左用鹵水汁，我再加左一大堆花椒落去煲鹵水度。
鹵呀鹵呀鹵～
其實唔需要煮好耐，半個鐘之後檢查一下，可以先夾起鴨舌，留低鴨翼煮多十五分鐘就差唔多夠入味。
顏色係咪好靚呢？係咪睇見就想食呢？
