週末最適合做一道平時放工之後無時間煮既菜。
（其實都不過係要一個半鐘頭左右）

材料要有牛腩肉（牛坑腩？牛肋骨位既肉）、薯仔、紅蘿蔔、蔥。調味需要酒、味醂、日式豉油。同埋少少麵粉。（無麵粉可以用粟粉或生粉代替）

將牛腩切成條狀，再照個人喜好切成適當的大小。

用一個大盤，放約半杯既麵粉，將牛腩塊表面撲一層薄薄既粉。拍打一下牛腩塊，打剩最少既麵粉係表面就夠。

千祈唔好一次過將所有牛腩塊一齊煎！
將牛腩塊分成幾份，每一次只煎一份牛肉，確保個鑊有足夠空間同埋熱力去煎香牛腩塊。煎好一份之後等個鑊夠熱先再煎第二份，咁樣做除左可以將牛肉既肉汁鎖住，亦因為煎香左既牛肉可以帶出牛肉本身既甜味，所以呢一個步驟不可少。

煎好就放到碗中待用，放一張吸油紙係底將煎肉既時候多餘既油吸走。
全部都煎好之後，將鑊入面既油同埋煮到黑色既麵粉倒出，剩返少量既油再次炒香牛腩塊。

加酒去炒牛腩。
唔需要好多酒，亦唔一定要用呢款酒，只要係烈酒就可以。
炒到所有酒揮發晒就可以加水去炆。
（用呢款酒係因為用黎飲唔係咁易入口，如果用黎個雞尾酒又好似好浪費咁。用少少黎炒牛腩就岩岩好，香味非常好。）

加日本豉油同味醂（日式甜味廚用酒）黎調味。屋企無味醂既話，咁就要加多少少酒同埋糖既份量都要加多。（用冰糖、片糖、黃糖、黑糖甚至是白砂糖都可以，方便就好。）

加水直到所有肉都浸係水入面。
開猛火煮到水滾，然後轉細火慢慢炆。
水咁深色您梗係以為落左好多豉油啦？其實係酒炒乾左之後變成有少少焦糖咁樣，加上之前煎肉的既鑊底既精華，用水煮番出黎既顏色啊～
豉油記住唔好落咁多，因為水會煮乾，味道會濃縮，如果一早就調較味道，水煮乾之後肉同汁就會太過鹹架啦～
所以燉好牛肉之後先至係做最後既調味既適當時候。

係等牛肉煮好既時候，就可以去準備係炆肉最後半個鐘需要加入去一齊煮既薯仔同紅蘿蔔。簡單咁切一切、洗一洗，到整理好就差唔多時間啦？
炆到肉夠軟就可以。因為係牛肋排既肉，肉本身既油花都好夠，所以煮一個鐘頭應該足夠。

裝飯然後將牛腩、薯仔同紅蘿蔔淋係飯上面，記得要加蔥花係上面，即刻靚晒～
咁樣煮一大煲都夠幾個人一齊食，或者係攤凍之後，放入雪櫃可以放好幾日既。不過我第二日早餐同午餐都係食呢味，所以都唔需要諗點樣去處理佢。
呢個就係週末下午可以花多少少時間去煮炆牛肉既食譜。
其實如果平日好忙，完全無時間煮飯既話，可以係週末炆好一大煲，然後分成岩岩好一餐既份量冰起佢。到左要食果日既朝早放去雪櫃慢慢解冰，到放工再攞出黎煮返熱就食得啦～