之前一篇 [飲食] H mart 韓國超市 之中有提到要寫一篇黎介紹點樣食牛仔骨同豬腩肉片。
拖左好耐，成個月之後先記得一直都未寫喎。我諗好多人都放棄左我呢個 BLOG 架啦。
不過講左要做就應該要做到既，請看：
上面既圖就係豬腩肉切片煎好，再加上紫菜、白飯、韓式燒肉醬，同埋豬肉片捲埋一齊食。
豬腩肉片打開包裝之後洗一洗，然後就可以晾乾水或者用紙吸乾水，唔駛醃就直接落乾鑊度煎。因為豬腩肉好肥，所以唔需要加油去煎。最好可以煎完一轉，再煎下一批肉既時候先倒走之前煎出黎既油。（好多油架！）
之後就用較剪將肉片剪成小片。最好係煎完先剪，因為肉會收縮得幾勁咁，未煎前剪半吋既話，煎完可能變肉條架咋～
咁到底要點先可以好似咁樣捲黎食呢？
首先撕一張手掌咁大既烤紫菜，加兩匙羹飯係上面。用羹背壓平，好似做壽司咁。
加一羹既韓式辣味燒烤醬，然後放幾片煎豬肉片係上面。咁樣就捲埋就可以啦～
食一捲邊度夠？！再黎做多一次！
撕一張用鹽烤過既紫菜，加上大概一到兩口既白飯。
加一羹上面呢款韓式燒烤醬，連盒面既圖都係燒烤過既豬腩肉片啊～
加幾片肉片，然後再加少少醬，再加多幾片豬肉片，再加多少少醬同埋煎肉既肉汁。捲埋就食得啦！
其實最好係做一捲岩岩好可以一次過放到入口既大小。不過我個人貪心丫嘛，所以做到要分兩口先可以食得晒既。（笑）
然後煎牛仔骨都係一樣，最好先用紙吸乾多餘既醃料醬汁。如果唔咁做，醬汁入面既糖會好快會煮成焦糖，跟住就會好大煙，到時成間屋都係煎牛仔骨既味。
煎好就配一大堆既既韓式燒烤醬黎食。
正到爆呀～送飯一流！
咁樣一碟既牛仔骨真係起碼食兩碗飯啦～
不過就咁空口食都好正，同埋已經有豬腩肉片捲飯咁食，所以一下子就食到剩返一塊咁大把留黎影相。
同時我仲煮左碗麵豉湯。
用杏鮑菇加上小唐菜，用兩碗水煮到菇同菜變軟就可以加麵豉醬同埋柴魚昆布濃縮湯底，再煮到水滾就可以啦～
不過咁，其實食煎豬腩肉片同埋牛仔骨，最正既配搭都係啤酒！
日本既麒麟啤，係多倫多唔係每一間啤酒舖都有得賣，但因為我覺得佢係多倫多可以買到既幾款日本啤酒之中最好飲既，而且其中一個銷售點就係最近我屋企既啤酒舖...咁好自然就揀佢啦～
根據啤酒達人指點，啤酒真係用杯黎飲會比起用樽直接咁飲會好飲好多，唔知點解呢？
