最想再見的人，大概係我好耐無見既朋友。

其實大家係同一個城市居住，理論上要見到面應該唔係咁難，但係竟然係出乎意料地難。每日工作之後已經無乜時間可以同屋企人見面，係週末兩日至少俾一日同屋企聚會，另外一日用黎休息感覺好似已經唔夠，好難再分時間出黎同朋友見面。
因為大部份朋友都已經結左婚，所以即使偶爾有假期，一般都會選擇用黎同伴侶享受一下二人世界。
絕對唔會認為咁樣係見色忘友，反而覺得佢唔咁樣做仲好似有問題咁。（俾著係我？聖誕新年先再見啦～）

對於回流返左香港既朋友，見面難係好正常，但連聯絡都一樣唔容易。因為兩地時差既關係，根本上無乜可能可以利用互聯網進行即時既交談。
使用電郵既話又好似唔係好適合閒話家常咁。而且一年半載都唔寫下電郵，突然寫封信俾人又好似好奇怪咁。

移民前所認識既朋友，已經完全無晒聯絡。唔好話我無留得低當年小學既紀念冊丫，就算有留低都無用啦，香港九龍既電話號碼都加左好似兩次字頭，同埋大家仲係咪住係同一區都成問題啦～
（利用 Google Maps 既街道景象，我都只係大概認得出以前住既地方附近一兩成既店舖，連以前小學既樣都唔同晒咁。）

上一次見到朋友既時候已經係兩個月前既事啦～唔知聖誕新年會唔會見到佢地呢？ 

我最喜愛的劇集？香港劇集要算係《衝上雲霄》，日劇會係《Love Generation》（戀愛世紀），韓劇會係《市政廳》，美劇《CSI:Crime Scene Investigation》，英國劇集《Spook》（別名：MI-5。），台劇幾乎要從缺（詳見下文）。

我的母語是「廣東話」（粵語）。
之後接觸到的，就是我曾祖父母的「台山話」。一直都沒有想過這算是另一種語言（在家經常都是使用「廣東話 + 台山話」），但因為「台山話」其實沒有甚麼獨特的文字去表現它，所以可能只算是一種方言吧？

跟很多香港人一樣，英文 ABC 大概第一種接觸到的外國語言。英語可以算是我的第二語言，不過認真的細分之下，「英式英語」是我的第二語言，但現在對我來說我比較常用的是「北美式英語」。
為甚麼會說是「北美式英語」而不是「美式英語」呢？因為在加拿大所使用的英語會比較偏重迎合美國使用的方式，但仍然保留「英式英語」的部份特點。

小學時期是第一次正式接觸「國語」（普通話），正式地學「國語」的時間很短，短到根本無可能掌握，只會用普遍捲著舌頭胡亂說。「中國式國語」是小學時期學到的，後來自學時候看台灣綜藝節目學到的是「台灣式國語」。「台灣式國語」給我的感覺是不能用捲舌頭的方式，而且每句說話的結尾都有一種獨特的尾音。

其實到這地步，我所學過的語言已經不算少了。不過因為對日本遊戲有嚮往，所以中學時期就一直想要學「日語」，但一直到近年才開始利用電腦軟件自學。
學習「日語」之後會發現因為之前多種語言的影響，會不斷想要跟其他比較熟悉的語言作出關聯，從而增加學習的難度。對！是難度！因為看到日文中的漢字，會先入為主的想成是中文的意思。而看到日文的片假名時，會想要跟英文的意思作出聯系，但片假名很多時候都不能用英文完整地配對。

要我自己評定「我的第二語言」，以最早接觸來計算，會是「台山話」（？），但正式來說應該算「英式英語」。不過今時今日應用第二位的語言，「廣東話」（粵語）會變成「我的第二語言」。
假如用流利程度來計算，「日語」會突然變成「我的第二語言」，因為其他多種不同的語言（或方言）都是平等地在第一位啊～
（可見我對我「廣東話」的能力的自信程度之低落。） 

其實曾經有一段時間，我既生活作息係「日落而作，日出而息」。沉迷上網既日子，早係98/99年已經開始，2000年之後更變本加厲，明明係住多倫多（GMT -5）既，但就偏偏用香港時間（GMT +8）生活。

時差相隔十三個小時，基本上就日與夜既分別，每晚起身就開始上網，到第二朝聽到有雀仔叫先至去瞓。上網玩到有時其他網友會好奇我到底係住邊度既，因為佢地覺得無乜可能有人會係咁日夜顛倒，仲要日日如是。

可能係之前玩得太盡，所以後來工作之後，就完全無機會再次見到日落日出。每朝起身返工都係未天光，入到公司都望唔到出面既，到收工就已經天都黑晒，完全見唔到太陽光既。唯一有既就係月亮反射太陽既光線囉～

有好多人去旅行或者偶然既時候，都會特別去山頂睇日出或者海邊睇日落，大家都覺得日落日出係美景。
但對我黎講，日落日出已經算得上係奇景，係非常難得一見既景況。（淚） 

最差既上司？
曾經有一段時間係朋友既小公司工作，工作係朝十晚四既鐘數，因為係當幫下佢手，所以人工就係最低時薪工資。

開始做左大概兩個星期，佢開始要我早D返工，因為要做準備工作，咁到十點就可以即刻開工。
諗住算啦，反正都係早少少，但可惜漸漸變成九點半就要返到，甚至後來要早到九點就會打電話黎催。

最衰既就係有一次到左三點，下一更既人已經返到，咁完成交接就差唔多係時候我準備走啦？但因為如果多一個人做野就可以趕係同一日之內完成，咁我就諗住係幫手搞掂埋先走人。
點知到完成左工作之後，都成七點幾，咁我就話乜咁就加班加到咁夜架嗱？佢就話我無叫你加班架，係你自己留低，係你要留係度玩之嘛～無加班費俾你架。

我心諗有無搞錯？我都無出聲話要加班費，駛唔駛咁快閂後門呀！
（結果就係慢慢遲到早退，最後就無繼續幫佢啦～反正佢都無叫我幫佢！）

最差既同事？
都無丫，同事多數都係廢。

有一個同事職位係會計部既普通職員，但係數學程度應該唔係太高，因為佢經常都將一D好簡單既數攪亂晒。
有一次一間公司分左兩張票黎清左一張 $7000 既單，分別係一張 $5000，另一張係 $2000。
咁收到呢兩張票就好自然咁交俾會計部入數啦～

點知過左兩日呢個同事就走黎問，點解呢間公司仲未找清 $7000 條數？
咁我就問同事係咪無收到果兩張票，佢話有收到，但係數目唔岩！

我問佢點唔岩數呀？$5000+$2000 咪 $7000 囉，佢就猛話數目唔岩。我話 $5000 或者 $2000 都唔等於 $7000，但佢地加埋咪岩囉。

結果電郵來往幾次之後，當我直接將計算方式寫埋出黎，佢終於無再反駁我既 $5000+$2000=$7000 既論點。
（我諗佢既意思可能係分左兩張票，要入數會好麻煩？但我係電郵之中只係感覺到佢唔識得加數。）

所以話我既同事係廢，都唔算係差既？（苦笑） 

音樂？其實不同類型的音樂我都聽，但是我很少會聽音樂。
係屋企我唔會聽音樂，開車既時候我覺得音樂係一種干擾，返到公司就更加唔會播音樂啦～
所以我真係好少好少會聽音樂。

加上近年大家都將 音樂＝MP3=蘋果 iPod，好似唔用 iPod 就唔聽得歌咁樣，同埋呢度要合法下載到中文音樂唔係咁易，所以就進一步令我唔想去發掘聽音樂既機會。
（我會咁少聽音樂，當然同香港既粵語音樂無咩岩我聽既音樂係有好大關係。） 

至於學音樂，基於我由細個果陣一路都唔係好睇得明D豆豉，所以一直都唔識得點樣去睇樂譜去演奏樂器。
（其實我諗係因為响學校係強逼去學，所以就有反感，之後大個左都其實有比較明白音符係點樣既。）

同音樂經歷過既野？小學既時候有好多同學都係有學樂器架，但我就無啦～（理由如上述）
不過有時候回憶都係同音樂好有關連，突然聽到某遊戲既音樂，會即時回想起玩某遊戲時期既片段。就好似當你聽到聖誕節做主題既歌，好自然會諗起聖誕節。

其實講左咁多都好似係同粵語流行曲有關，而唔係同音樂整體既關係。因為粵語流行曲真係做得太多而做得好既太少，所以係音樂之中可以算得上係我最無興趣既。
或者咁講，我對於無人聲既樂曲既接受程度係比較高，所以古典音樂或爵士音樂比較適合我。
（唔係懶高級咁啦，只不過係頂唔順好多喉嚨能夠發聲既人就走出黎做歌手。聲色藝都無，完全靠宣傳堆砌出黎，黐線架！）

我諗好多人都一樣，係到左入大學先至申請人生第一張信用卡。我都係十幾年前申請信用卡，一直都只係有一張信用卡用左十年，早兩年先申請左另一張信用卡。

信用卡對我黎講其實只不過係唔駛帶現錢出街咁，我都無話會積落幾千幾萬卡數係身咁既。

我第一張信用卡係銀行同油站結盟既卡，係果間油站入油會雙重積分，儲埋儲埋都可以免費洗車幾十次架～（不過就好少洗，所以架車都幾污糟咁。）

後來第二張卡就係因為貪超級市場有積分計劃既信用卡，儲夠分可以免費買野食喎，一開始入會仲有野送咁，咪申請囉～

零八年十月既時候，點解仲咁 cheap 只係送 256 MB 既 USB？好明顯係其他地區既貨尾啦～（另外仲有現金 $20 既購物劵，同埋一大包既朱古力曲奇餅囉～）

不過兩年計落我都用積分換左 $300 超級市場既野（即係港紙 $2100+），無所謂啦～（反正用信用卡俾好多野都係必需既，順便賺下積分買下野食都幾好丫～）

話時話呢張信用卡都有一個幾好既地方，就係最近佢會係網上帳單度寫一個溫馨提示，話俾您知如果家陣您既戶口既數，從而家開始每個月只係俾最低還款額既話，按佢地既息口計數，您要用XX年XX月先至可以還清。
話說早幾期我岩岩用卡交左汽車保險費同埋幾條大數，佢既溫馨提示就話俾我知，如果我只交最低還款額（好似係一期幾十蚊？），就要用 29 年零幾個月（唔多記得）先可以還得晒咁話喎！！
你都咪話唔嚇親，都唔係借左好多錢之嘛，居然要還到我差唔多退休先還得晒，可以知道息口有幾勁。

其實申請一張新卡之後，最好就先計一計你自己既還款能力，同埋計一下張卡既息口，唔好"借"左錢先諗還唔還得起呀～
我果期少少錢都要29年先還得晒，如果你一次"借"到盡，可能係一世都還唔完架！
日本漫畫《詐欺獵人》的例子：
"借" 250 萬，每月還 3 萬。年利息 15%。咁樣就一世都還唔完啦～

套返個香港數值既錢丫？！再加上一般信用卡都要 18 - 20% 啦？
咁即係"借" 25 萬，每個月還 3 千蚊，利息係 20% 既話，你就算吧啦～
就算你還到 4 千 5 百蚊，都要 13 年以上先還得清呢條數。但問題係，你肯定你 13 年之內都唔會再簽卡數？
你要一個月還到 7 千蚊，咁先至有可能係五年內還清呢條數，每個月 7 千蚊？邊有可能丫～ 

（我諗好多人都無試過咁樣計一下呢條數。不如就用今期既月結黎試一下丫～包你有一個意外驚喜架～） 

要數介意既事，可能真係好多，小事到有人用條脷剔牙發出嘖嘖聲之類，其實我都好介意架，不過講得幾次人地都唔改／停止，咁就無謂再多講啦～

家陣最介意既，大概就係俾人話肥。

我五呎六，體重係一百五十幾磅，腰圍係 30 吋，身體脂肪比例（今日）係 21.9%，唔算係好肥，當然有減肥既空間。 

我從來都唔算得係瘦，但唔等於可以隨便俾人話我肥。
最老土你知唔知係咩？就係一個XX死肥仔，唔知點解佢會覺得自己身型好好咁，係公開場合走埋黎大大聲同我講：肥仔，減下肥啦～

呢個男人大概五呎八，最多俾盡佢五呎十，高峰時期係過二百磅，家陣回落都係一百八十幾磅咁。腰圍幾多？懷胎七、八個月左右啦，孕婦黎計都算係過胖啦～

當然你二、三百磅都可以評論另一個人係唔係肥，但唔該唔好用一種＂你睇我身型幾好，我食到肥屍大隻咁都無問題。＂既態度黎評論人。
如果你用一個癡肥病人提醒世人既語氣或作為出發點咁去勸人既話，我覺得無咁令人反感囉。

另外一樣令我介意既係有人話我＂肥＂而令我溝唔到女。
呢一下我只係可以用粗口黎回應。XXXXXXXXXX

我無女友係因為我無去溝女，係呢段時間我唔想去溝女，我身邊亦都無異性令我覺得想要去追求，我亦無打算去發掘或擴大社交圈子，我亦唔係同性戀，只不過完全唔想去溝女。

我唔排除即使我去溝女都好有可能溝唔到，但家陣根本就係我唔去溝，同溝唔溝得到，甚至係同我身型肥或瘦毫無關係。

又唔係有幾十個靚女排晒隊係度等我減肥之後就受我溝，真係有既話就通知我，大家坐低再研究一下我要減肥減幾多啦～

要數十個我最想去旅行既地方都幾容易，因為我一直都想去旅行，只不過係無錢同無伴，所以好耐都無去旅行之嘛。

排名分先後次序：日本、台灣、英國、韓國、意大利、葡萄牙、西班牙、法國、中國、美國。

日本：我會想去沖繩、北海道、大阪、名古屋、京都、東京…基本上都係香港人經常會去既著名地點。除左東京之外，其他地方我都無去過，好想試下真正既溫泉，食下地道既日本料理。

台灣：我會想去環島遊，因為台灣到處都有好野食，加上近年網絡認識好多台灣人，發現台灣由南到北、東至西都有好多特式食物。臭豆腐真係好正啊～

英國：基本上想去既原因係殖民地一輩對宗主國既一種奇異情意結。（笑）
其實英國都有好多英國本土既食物已經混入左香港人既飲食文化當中，可以話係一次美食尋根之旅？（我愛奶茶！）

韓國：我好鐘意食泡菜！雖然韓國食物俾人既印象係辣，但好多都係辣中帶甜（其實甜既食物比辣既仲多），好岩我胃口！

意大利：意大利粉固然係重點，但芝士同火腿甚至香腸先至係好野！咁當然正宗既薄餅亦都係好吸引…教堂？咩教堂啊？

葡萄牙：葡萄牙既香腸又係一絕！加上有幾樣日本既野食都係來自葡萄牙，當中 "天婦羅" 就係最為人所熟悉啦～

西班牙：西班牙海鮮飯梗係首選啦～加上西班牙既 Tapas 好似小點心咁，岩晒鐘意樣樣野都想試下既我。

法國：法國菜出名，法國酒仲出名，咁去到法國就必然要飲飽食醉啦～

中國：唔數中國會俾人話唔愛國架喎。不過中國大江南北都有世界知名既料理，人地話「不上長城非好漢」，我就話未去過北京食過北京烤鴨點算得上叫做為食啊？
（中國仲有好多好多名菜，真係要去發源地試一試先得。） 

美國：美國俾人話佢無乜自己既本土飲食文化，但係除左當年歐洲移民帶俾美國既烹飪方式，美國人到左今時今日都有好多屬於自己既菜式。南部既菜式加上 Barbecue （當中煙燻的方式最吸引）。

係架，我去旅行真係會為左食架咋，食飽左咪去行下睇下景點咁囉，所以要自助旅行，因為我諗都無咩旅行團會有咁樣既安排卦？ 

我諗我係有「特價貨品資訊獲取強逼症」。
係加拿大多倫多大部份商店都會有每週特價既宣傳單張，一般都會連同一份社區消息既小報紙，係星期四晚上免費派發到每一個住宅既門前。
每逢星期四就會好期待呢一份報紙連宣傳單張（稱為 Flyer），因為有齊百貨公司、電器產品專門店、家具用品店以及超級市場既特價資訊，可以係屋企先計劃好有乜野需要買同埋去邊度買係最平。

一直以來都係只有本地超級市場既 Flyer, 但係自從加拿大西岸華人集團式經營既 大統華超級市場 進軍東岸市場，開始係該超市網頁上推出每週特價既 Flyer 俾顧客瀏覽，之後多間華人超級市場爭相仿效，於一份華人免費週報上刊登每週特價貨品既廣告。

近年更演變成有一個專門收集各家商店 Flyer 既網站，flyercenter.com。

我每星期四晚就會上去睇一次，睇下有無更新，因為有幾間超級市場會營業到半夜十二點（甚至更夜），所以有時候廣告會要等到星期五先會出現。
咁我就會不斷地隔一個鐘頭就上去睇一次，星期四晚睇唔到咩？咪星期五又睇，星期五下午又睇，一定要睇晒所有商店既特價先安樂咁。
（但其實又唔一定會去買野架喎，不過就係要睇下知道下咁囉。）

到左真係要準備出門口去買野既時候，又要上網去睇多一次，驚死自己唔記得要去邊度買平野咁，所以呢個網站使用率已經係僅次於 iGoogle.com，瀏覽器記錄中坐二望一。（好幾次試過衝上第一位添！）

咁都算得上係一種強逼症。我諗。